گـزیده اخبــار
خانه » اندیشه » د یـــاد و نــو پــر څـــلي د او ښـکو نــذرانه ! د عـــصمت قانع لیکنه
د یـــاد و  نــو پــر څـــلي د او ښـکو نــذرانه ! د عـــصمت قانع لیکنه

د یـــاد و نــو پــر څـــلي د او ښـکو نــذرانه ! د عـــصمت قانع لیکنه

 Ashk 04

شهرت ننګیال مې یار وو ـ چې زړه به مې راوپړسید نو د پیښور د ګوړو منډیي ته به ولاړم په کرایي کوټه به ورننوتم. له ورایه به د یوه تاند ځوان رڼو او ځیرکو سترګو په ژر ژر ځبنیدلو کې هر کلی راته ووایه. د ۱۲۰ کلدارو پر پاکستاني سترنجۍ به سره کیناستو او د خپل جهاد د بري په پای کې به د جوړېدونکي افغانستان پر څرنګوالي باندې په بحث سره واوښتو. ده به راته ویل، چې د عدل نظام به جوړېږي، تر اوسه پورې موږ ته پردو د نظامونو او حکومتونو نقشې راکولې، اوس چې زموږ ملت راوېښیږي نو د خپل ملت په زور به د خپل وطن د ګټو او مفاداتو هغه افغانستان جوړو، چې زموږ د ارمانونو تابلو په کې زموږ د توی شویو وینو رنګ راپورته کړي. عجیب معصومیت وو، عجیب احساس وو، اوس چې فکر کوم د یوه بې هوشه قمار باز په څیر مې د معصومو ارمانونو او هیلو ټوله پانګه لوټل شوې ده او د تن جامې مې هم د قمار د میدان له جیز ګرانو سره ګاڼه یا ګرو پاتې دي، هېڅ نه دي راته پاتې هر څه رانه لوټل شوي دي. جهاد د هوس د میدان د څو بزکشو پهلوانانو هغه سخوندر ته پاتې دی، چې څوک غواړي د امریکا تر دایرې پورې یې ورسوي او څوک یې د ایران او پاکستان تر دایرې پورې رسول غواړي، خو د ملت د وینو تابلو لا هماغسې پر څټ پرته ده. لا د وینو او اوښکو باران پرې اوري، لا هم د اسمان په شنه لمن پورې د وریځو تور او لوغړن پېڅولونه نښتي دي، لا هم د اسمان شنه کېږدۍ د لوخړو تورو لوګیو پرسر اخستې ده.د دنیا له ګوټ ګوټ څخه جنګیالي راغلي دي او دلته د خپلو راتلونکو نسلونو او وختونو د مفاداتو جګړه کوي، خو هغه ملت چې ما او ننګیال یې د راڼه سباوون خوبونه د پیښور په ګوړو منډه یي کې یو بل ته تعریفول نن د مرګي په خوب ویده دي او یا خو مړه دي او په دې څلور کنجر دنیا کې داسې څوک نشته، چې دغه ملت د مرګ پوسټ مارتم وکړي یعنې د مړینې عدلي لایسنس یې اجراء کړي. څوک یې دین نه مني او څوک یې دنیاء، څوک یې پر هویت منکر دي او څوک یې پر موجودیت، څوک یې د تاریخ دښمن دي او څوک یې د جغرافیې، څوک یې سهارونه لوټي او څوک یې د تورو ماښامونو ستوري په بډه وهي. های ننګیاله! یاد دې شي، چې ویل به دې دا رهبران دلته رهبران دي، چې د افغان وطن د ګټو حکم د اسلام اباد له لوري ورکول کېږي. په والله که په افغانستان کې ددې خلکو په خوله څوک تریخ پیاز وخوري. که نن د وسلو ګودامونه او د کلدارو اکاونټونه د اسلام اباد له لوري وتړل شي دا رهبران دومره معنوي توان نه لري، چې د افغانستان پر خلکو دې د یوه ساعت لپاره هم د رهبرۍ او زعامت برم جلال او پرتم پریباسي.هماغه رهبران په کابل کې د وسلو ګودامونه او د ډالرو اکاونټونه لري او ستا هغه باتور ملت رګ هم نه ښوروي کوم چې تا د غلو او لوټمارانو د محاکمې او محاسبې لاپې او شاپې پرې وهلې. ستا تر ملت خو عربان هم ښه شول خپل غله خو یې په رڼا ورځ تر څټ ونیول، ستا تر ملت خو د مرکزي اسیا تر روسي استعمار لاندې تاجکان، ازبکان، ترکمنان او قرغیزیان هم ښه شول.لږ تر لږه د دنیا د ګټو دومره ستر ناورین د لوبو آلې خو نه دي ترې جوړې، ستا تر ملت د ایتوپیا د دښمنو قبیلو ناجوړه ملت هم ښه دی لږ تر لږه د فهیم په څیر د جمهوري ریاست معاون خو نه لري، د عطاء په څیر بې سواده خو په کې والي کیدای نه شي.

ننګیاله! له ۳۲ کالو وروسته نن یو ځل بیا ستا یاد زما د لیمو پر اسمان وریځ شوی دی او څاڅکي څاڅکي اوري. بس د الفاظو یوه بې روحه تابلو ده دروایې خله!

ننګیال ته!

له اوښلنو سترګو توی چې څومره نم دی

هغه رنګ ستا د خامې ستا د قلم دی

د رنځور وطن انځور په کې ښکارېږي

زړه دې نه دی، خو تصویر د جام جم دی

ستا د سترګو په کاسه کې عدن ښکاري

ستا صنم لا د ارمان د کور صنم دی

د غمونو څومره لویه پانګه ساتې

چا ویلو د احساس انګړ دې کم دی

د ګلانو وریځ بل وطن ته ولاړه

د سرو وینو باران ستا پر وطن تم دی

زموږ په چیغو اولس ویښ نه شو ویده دی

سرنوشت مو د خوشحال په څېر په غم دی

د مغل پر سوټه اچوي ګوزونه

د پښتون ټغن څغۍ ته متار سم دی

عصمت قانع

______________________

دله کابل څخه خپریدونکی محور ورځپاڼې څخه په مننه 

جوابی بنویسید

ایمیل شما نشر نخواهد شدخانه های ضروری نشانه گذاری شده است. *

*

بالا