گـزیده اخبــار

خانه » اجتماعی » د استاد سیاف د وژلو غوښتنه !
د استاد سیاف د وژلو غوښتنه !

د استاد سیاف د وژلو غوښتنه !

Nazar Mohamad Mutmain Name 01

د پګواش غونډې لومړۍ ورځ ځینې داسی خبرې وشوې چې اړینه ده افغان ولس ورڅخه خبر شی. خبرې به ګرده مهمې وی، زما له پاره پکې درې داسی ټکی دی چې غواړم ستاسی سره یې شریک کړم.عمر داودزی چې د پخوانی ولسمشر کرزی د دفتر رئیس، پاکستان کې افغان سفیر او بیا وروسته د کورنیوچارو وزیر و، لومړی ځل و چې د طالبانو سره په یوه مخامخ ناسته کې په دوحه کې ناست و.   د ۲۰۱۵ ز کال په ډسمبر میاشت کې ښاغلی محمد عمر داودزی امریکا ته تللی و، هلته یې د امریکا د بهرنیو چارو او ځینو نورو پټو ادارو له مهمو غړو سره ناستې درلودلی.

Pugwash Agenda

ښاغلی داودزی هوډ لری چې راتلونکی ولسمشریزې ټاکنې که کیږی یو مهم نوماند به پکې دی وی، له اوس نه یې خپل په ګټه کمپاین پېل کړی، په امریکا کې یې بېلابېلو امریکایې چارواکو ته د نورو خبرو تر څنګ دا هم ویلی ‌وو چې له طالبانو سره نږدې اړیکې لری او د راتلونکې ولسمشر کیدو له پاره به دده له نوماندی سره طالبان هم ستونزه ونه لری. دا ډول یې امریکایانو ته ډاډ ورکړی وو چې له ځینو طالبانو سره په اړیکه کې دی. ښاغلی داودزی ځینو ځوانو سیاستوالو ته ویلی و چې د امریکا څخه له راستنیدو سره سم به یو لوی دفتر په کابل کې پرانیزی او خپلې سیاسی هڅې به په جلا ډول پېل کوی. ولی کله چې راستون شو مایوس ښکاریدی او امریکایانو ورسره د ده د توقع مطابق ژمنې نه وی کړی، د ښاغلی داودزی نیت و چې د کابل سربیره خپل فعالیتونه ولایتونو ته هم وغځوی. همدا لامل و بیا نو د حراست او ثبات په نوی جوړښت کې ورسره پاتې او له هغوی سره یوځای اوس د واک له پاره هڅې کوی،‌ په دغه نوی جوړښت کې ښاغلی استاد سیاف او ښاغلی‌ قانونی هم هیله لری‌ چې راتلونکې افغان مشرتابه کې مخکښ وی.د ښاغلی داودزی سره امریکایانو ځکه په ژمنو کې شرطونه وړاندی کړل، هغوی له بېلابېلا نورو افغان سرچینو سره په امریکا کې اړیکې ونیولی،‌ د داودزی او طالبانو د اړیکو پوښتنه یې ورڅخه کوله،‌ هغوی چې په دی پوهیدل چې د کورنیو چارو پخوانی وزیر رابطه نه درلودله او امریکایانو ته یو ډول دغه خبره ناسمه معلومه شوه، اوس به ښاغلی داودزی خپله ټوله هڅه کوی چې امریکایانو ته وښیې چې له طالبانو سره اړیکې لری.داسی راپورونه هم شته چې د ښاغلی‌ داودزی نوم د پګواش کانفرانس په لومړنی لسټ کې نه و، په وروسته وخت کې دغه نوم پکې ورزیات شوی و.

Omar dawodzai exqiuzmi from Taliban

له طالبانو څخه بخښنه غوښتل

خپلې تیروتنې منل او پر خپلو تیروتنو اعتراف کول او بخښنه غوښتل د پیاوړو خلکو کار وی،‌ او همداسی په خپله خبر دریدل هم د ځواکمنو او ازادو سیاستوالو کار وی.دوحه کې د پګواش دوېمه ناسته کې ښاغلی‌ داودزی د غونډې په لومړۍ ورځ وویل چې طالبان مظلوم واقع شوې پر دوی ظلم شوې، په تیرو ۱۴ کلونو کې بېلابېل مشکلات ورته پېښ او له خپلو کورونو څخه پسی‌ واخستل شول،‌ زه د تیر وخت د کرزی د دفتر درئیس،‌ پاکستان کې د سفیر او کورنیو چارو د وزیر په صفت له طالبانو د حکومت د دغو ناسمو تګلارو له امله بخښنه غواړم.ښه خو داوه چې د خپل واک په وخت کې یې داکار کړی وای،‌ که بخښنه یې نه غوښتلای اقلا د حکومت د ناسمو تګلارو څخه یې په ځینو وختونو کې یادونه کړی وای. مګر هلته خو دواک او ځواک خبره وه،‌ طالب تروریست او د وژلو وړ و.ښاغلی دوادزی چې په پاکستان کې سفیر او کله به کابل ته راغی نو د معلوماتو شریکولو په موخه به یې له ښاغلی وحید مژده سره خامخا کتل، حتی څو ځله، خو کله چې د کورنیو چارو وزیر شو او مژده صاحب ته راپیدا شو ستونزو لا هم دوام درلود، هغه هم له دی کبله چې  ښاغلی مژده له طالبانو سره اړیکې لری، مژده صاحب چې هرڅومره هڅه وکړه چې دغه پخوانی سړی ووینی خو په سیاستوالو باور کول خامی ده،‌ هیڅکله یې دده د وزارت د دندې پرمهال ونه لیدی.بیا هم چې پګواش کې چې کومې خبرې داودزی وکړی موږ یې پرځای ګڼو چې په خپلو تیروتنو یې اعتراف وکړ، او په اصل کې دا امریکا په راتګ هم نیوکه ده چې هغوی دلته د مظلومو افغانانو د وژلو له پاره راغلی دی.‌ولی کاش چې په همدې خپله خبره پاتې شوی وای، له همدې خبرې کولو اته ورځې وروسته یې لیکنه وکړه او ویې ویل چې له طالبانو مې بخښنه نه ده غوښتې. ډاکټر فیض محمد ځلاند په همهغه تالار کې وویل چې کاش داودزی صاحب دا خبره د خپلې دولتی دندې پر مهال کړی‌ وای، او کاش هغه وخت چې پخوانی ولسمشر کرزی په قطرکې د طالبانو د دفتر د پرانستلو مخالفت وکړ،‌ په هغه وخت کې یې کرزی له مخالفت څخه راګرځولی وای،‌ که کرزی مخالفت نه وای کړی اوس به مو د سولې اړوند ډیر پرمختګ درلود، او یا خو هغه وخت کې داودزی صاحب د احتجاج په ډول استعفی ورکړی وای او د حکومت په ناسمو تګلارو یې نیوکه کړی وای. اوس هم کله چې کابل ته ځو امید دی چې داودزی صاحب په خپله خبره پاتې شی او ورڅخه ونه ګرځی، دا ډول نور پخوانی او اوسنی چارواکی هم وهڅوی چې د حکومت د ناسمو تګلارو اړوند په وخت څرګندونی وکړی. د ځلاند صاحب اندیښنه پرځای وه، دادی داودزی صاحب له خپلې خبرې چې تر ۴۰ زیاتو د غونډې ګډونوالو مخکې یې له طالبانو بخښنه وغوښته اوس بیرته په شا شوې. ماته د غونډې ځینو ګډونوالو وویل چې اوس که دوادزی هر څه ووایې دا نو نور هم خپل حیثیت جرحه کوی ځکه موږ شاهدان یو چې ده له طالبانو څخه په روښانو ټکو کې بخښنه وغوښته.

Qaiom Kochi wa Taliban 01

طالبان دی استادسیاف ووژنی !

د ولسمشر اشرف غنی تره قیوم کوچی د خپل وراره له ډیر صفت کولو وروسته او پر طالبانو له توندو نیوکو کولو سره سره یوه د زړه خبره هم وکړه،‌ هغه طالبانو ته وویل چې تاسی ظالمان یاست، بې ګناه خلک وژنئ، بې ځایه جګړه کوئ، ‌حکومت نه شئ نیولای، راشئ له حکومت سره یوځای شئ او زه په خپل وراره ویاړم چې په ډیر مهارت سره یې له ډاکټر عبدالله سره ګډ حکومت جوړ کړ. ښاغلی کوچی وویل طالبان چې په کابل او نورو ځایونو کې بې ګناه عام افغانان وژنی او غټ مجرمین نه وژنی‌ دا زموږ له پاره د منلو وړ نه ده،‌ طالبان که رښتیا غواړی چې د افغانانو قاتلین او اصلی مجرمین ووژنی نو مهربانی دی وکړی تر ټولو لومړی دی استاد سیاف او د هغه هم مثله ووژنی. خینې ګډونوال وایې چې د استاد محقق نوم یې هم واخیست خو دغه نوم بیا نور ګډونوال نه تایدوی یواځی د استادسیاف د وژلو غوښتنه د کوچی له خوا تایدوی.د طالبانو د هیئت او قطر دفتر مشر ښاغلی‌ شیرمحمد عباس ستانکزی د ښاغلی قیوم کوچی د استاد سیاف د وژلو د غوښتنې اړوند ځواب کې ورته وویل چې: موږ ټولو هغو مجاهدینو کشرانو او مشرانو ته په درنه سترګه ګورو چې پخوانی شوروی اتحاد سره یې په جهاد کې برخه اخستی او کمونیزم یې د نړۍ له مخې ورک کړ. استاد سیاف د جهاد د رهبرانو څخه دی هغه له کمونسټانو سره جهاد کړی، موږ به هغه څوک وژنو چې د شوروی د یرغل پر مهال دهغوی غلامان او دهغوی له پاره جنګیدل، په اوس مهال کې د امریکا غلامان او د امریکا د ګټو له پاره له افغان ولس سره جګړه کوی، موږ به د هغو سیکولر کسانو سره هم جګړه کو چې له لویدیځ څخه راغلی‌او په افغانستان کې د سیکولریزم له پاره مبارزه کوی. ښاغلی کوچی! موږ پوهیږو چې لویدیځ غواړی زموږ او مجاهدینو تر منځ اختلافات لا زیات کړی او غواړی موږ په مجاهدینو او د مجاهدینو مشران په موږ ووژنی ، موږ به هیڅکله د مجاهدینو د مشرانو وژلو له پاره د لویدیخ د دغی سیسی ښکار نه شو.

د ملامحمد عمر مجاهد فاتحه

کله چې د طالبانو د هیئت مشر پورته خبرې د پروان ولایت اوسیدونکی او د کرزی په وخت کې د وزارت مرسیتال او د شمال ټلوالی مهم غړی ډاکټر حسام الدین همراز واوریدلی، او مجاهدینو ته د طالب مشر درناوی او له مجاهد سره د مینی‌او محبت څخه ډګې څرګندونی یې په داسی یوه مهمه ناسته کې په خپلو غوږو واوریدی هغه ډیر تعجب کاو، د ده سره نږدې ملګری ته یې وویل چې مرد است مرد، طالب مرد استهغه نږدې د غونډې بل ګډونوال ته وویل چې د ستانکزی صاحب خبره دی واوریدله چې کوچی ته یې سخت جواب ورکړ او د مجاهدینو ډیر درناوی یې وکړ.ډاکټر حسام الدین خپل مایک روښانه کړ او نوبت د خبرو هم دده و، هغه وویل چې مخکې له دی چې زه په خبرو پېل وکړم، زه غوښتنه کوم چې کوم ورور د قران کریم څو ایتونه تلاوت او ملامحمد عمر مجاهد ته دعا او دهغه فاتحه له موقع نه په استفاده همدلته واخلو.هغوی چې د ملامحمد عمر مجاهد د مرګ پر مهال د حکومت مهم غړې و او په کابل او نورو ښارونو کې یې د ملامحمد عمر مجاهد پر فاتحه بندیز لګولی و، همدلته په تالار کې ناست او هیچا هم ددې خبرې مخالفت ونه کړ، د قران کریم ایتونه تلاوت او ملامحمد عمر مجاهد ته د مغفرت او جنت الفردوس غوښته له الله  ج څخه وشوه.پاتې دی نه وی چې د فاتحې د غوښتنې اړوند د پګواش مشر ښاغلی پاولو هم ډیر متحیر و،‌ او هغه زیاته کړه چې عمومی فاتحه او دعا به وکړو.له دعا او فاتحې وروسته بیا ډاکټر حسام الدین په خپلو خبرو پېل وکړ او د سولې اړوند یې رغنده خبرې وکړی. د کانفرانس د همدې ورځې د غونډې د پای ته رسیدو وروسته ډاکټر حسام الدین ته ښاغلی کوچی ګوت څنډنه وکړه چې تا یو ناسم کار وکړ،‌ ولی دی په عام تالار کې د ملامحمد عمرمجاهد د فاتحې غوښتنه وکړه.

Dawod Zai in Confrance Pagwuash01

د خبرو ازادی

په قطر کې د پګواش دوېمه ناسته یو ښه پرمختګ ګڼلای شو، د بېلابېلو افغان شکېلو اړخونو غړو په ناسته کې ګډون درلود، په پوره ازادی سره یې خپل نظرونه، غوښتنې او اندیښنې یو له بل سره شریکولی،‌چې له دی جملې څخه د ملالۍ شینواری خبرې هم موږ یادولای شو، هغه خبرې چې د غونډې په ډیرو ګډونوالو ښې نه وی لګیدلی.د طالبانو د نظام پرمهال یو ځل د لوی اختر د لمانځه د اداء کولو له پاره دخپلې ولسوالۍ عیدګاه ته ولاړم، هلته مې د خبرو له پاره اجنډا داوه چې د ښوونې او روزنې په اهمیت خبرې وکړم، خلک وهڅوم چې خپل اولادونه ښوونځیو ته واستوی او پوهې ته توجه وشی، ولی ولسوال زما څخه وغوښتل چې د تیرو حکومتو د نظامونو په جوړښت هم خبرې وکړم،‌ ما لومړی د ښوونې او روزنې په اهمیت خبرې وکړی، خو دوېمه برخه چې لاهم تر اوسه ماته پښېمانی پرې راځی او د ولسوال فرمایش و، زما د خبرو هغه دروندوالی یې متاثره کړ.ملالۍ شینواری مخکې له تګ څخه د ولسمشر غنی باصلاحیته سلاکار ښاغلی ډاکټر اکرم خپلواک وروغوښتله، له هغې سره یې د پګواش کانفرانس اړوند خبرې وکړی او خپل فرمایشونه یې هم ورته ورکړل، شینواری وویل چې طالبانو ښځې مجبورولی چې په چادری کې غوا ولوشی (بیخې لوی تهمت دی)، دیته ورته نامناسبې او له ادبې چوکاټ څخه وتلی خبرې یې وکړی ، هغې ویل زه که مور نه یم،‌ تر اوسه مې واده نه دی کړی خو د مور عاطفه لرم،‌ تاسی د میندو زامن مه وژنئ،‌ دا ډول د خپلو ایمانو د ساتلو په موخه مو ښځو ته له کوره د وتلو او ښوونې او روزنې حق نه ورکاو. د خپل ځان ګناه څخه ساتلو له پاره مو ښځې په کور د کیناستلو قربانی کړی وی،‌  جالبه خبره یې دا هم وه چې که ځینې تلویزونونه ستاسی په آند ناسم پروګرامونه پر مخ وړی مهربانی وکړئ تاسی مه ورته ګورئ ، پدې معنی چې د عامو خلکو فحشا ته د تشویق مخه نیول نو ستاسی دنده نه ده.د طالبانو ځواب داو چې د ښځو له پاره د زده کړې مصؤن چاپیریال چې د نارینه او ښځو اختلاط نه وی  حق لری چې پوهنتون ووایې، ماسټرې او دوکتورا وکړی د اسلامی او کلتوری ارزښتونو په نظر کې نیولو سره خدمت وکړی.باوری یم چې زما په څیر چې د ولسوال په فرمایش مې یوه برخه خبرې کړی وی اوس هم پښېمانه یم دا ډول به ملالۍ شینواری هم د فرمایشې خبرو په کولو پښېمانه وی‌ او یا خو به په راتلونکې کې پښېمانه شی. مګر هوښیاره میرمن ده د مزمل صاحب خبرو ته یې هم سم غوږ ونه نیو او د حاجی فرید د خبرو پر مهال له تالاره ووتله.

paguwash Mozamil 06

د ناستو تسلسل

د پګواش او هر نړیوال کانفرانس ناستې موږ ته دا چانس راکوی چې خپلې غوښتنې، اندیښنې او ګیلې یو بل ته په مخامخ ډول وړاندی کړو، کلونه وړاندی‌ سوال نه پیداکیدی چې د افغان دولت د کورنیو چارو وزیر داودزی، د مالیې پخوانی وزیر شهرانی، د مالیې او سوداګرۍ پخوانی وزیر احدی، د لویدیځ په غیږ کې رالویې شوې ځینې افغان میرمنې (چې پښتو او درې یې خبرې نه شوای کولای او په انګریزی یې خبرې کولی)، مدنی فعالان او د بېلابېلو نظرونو لرونکې دی د طالبانو سره مخامخ کښینې او خپلې نیوکې دی په مخامخ او توند ډول سره د طالبانو مشرانو ته وړاندی کوی.د همدې نړیوالو کانفرانسونو نتیجه همدا ده چې طالبان د تیرو کانفرانسونو په پرتله داځل خپلې خبرې ډیرې روښانه او په ۱۳ پاڼو کې یې په بېلابېلو سولې اړوند موضوعاتو بحث وکړ،‌ د ګډونوالو پوښتنو،‌اندیښنو او ګیلو ته یې په حوصله ځواب ووایه.که دغه ډول ناستې تسلسل پیداکړی باوری یم چې یوه ورځ به بین الافغانی تفاهم د باور لرلو سره پېل او موږ به سولې ته ډیر نږدې شوې یو.

نو اندیشی د هرچا اوهرڅنګه  افکار په آزاده توګه تر تاسو دررسوی چی هیڅکله هم د نواندیشی پاڼی د تائید او یاهم د تردید په معنا نه شی انګیرلې .

 

جوابی بنویسید

ایمیل شما نشر نخواهد شدخانه های ضروری نشانه گذاری شده است. *

*

بالا