گـزیده اخبــار

خانه » اندیشه » دحاجی بادرنګ اکاد جنت نښانې اوداستاد سیاف سیاسی ژوند !
دحاجی بادرنګ اکاد جنت نښانې اوداستاد سیاف سیاسی ژوند !

دحاجی بادرنګ اکاد جنت نښانې اوداستاد سیاف سیاسی ژوند !

 Sayaf and Qanooni 23
 

له  تاند ویب پاڼې او ښاغلی لیکوال څخه په مننه  نواندیشی دځینو دلائیلو ته په پاملرنه د لیکنی عنوان یا سرلیک ته بدلون ورکړې دی .

 

          د حاجی بادرنګ اکا د جنت نښانې او د استاد سیاف سیاسی ژوند !           

                                                                                                                                                                                                                 Qaneh Esmat New Foto 24

                                                                                                                                                                                                     د محترم عصمت قانع لیکنه 

په کلیو او بانډو کې چې به پخوا اویا کلن یا اتیا کلن بوډاګان په خدایی مرګ باندې د ژوند له صحنې څخه کډه کیدلو، نو په تعزیتی غونډو او د غمشریکۍ په عنعنوی مجلسونو کې به څو تنه خاص غوړ ژبی چټاکان او چالاکان هم موجود وو او هر یوه به یې د مړه شوی مرحوم د ژوندو کرکټرونو جنتی علایم او سمبولونه په غوړه ژبه بیانول او بیا به یې یو ډراماتیک رینګی هم کولو چې ګویا د مرحوم په مړینه به یې دده د ژور خفګان څرګندونه کوله. ملایانو چې په دغه ډول حوادثو کې ورته د عوایدو مدرک په لاس ورتلو تر هر چا زیات د متوفی د جنتی کیدو او نېغ فردوس ته د تللو دینی او دنیاوی روایتونه بیانول. مثلاً ویل به یې، پردې دنیا لا جنتیی وو، کله چې یې وروستۍ سلګۍ د وجود له کالبوت څخه وتله په خپله یې سترګې د کعبې شریفې پر لور ورکږې شوې.

Sayaaaf And Ta...23

زموږ د کلی ملا طوطی اخند د کلی د بډای حاجی نو رنګ ماما په مړینه باندې ویل، چې حاجی نو رنګ ماما د ځنکدن په وخت کې لاسونه آخوا دیخوا غورځول، ژبه یې ګونګه وه، د لاسونو د ښورولو اصلی علت یې داوو چې د جنت د باغونو ګلدستو ته یې لاس ورغځاوه، خو موږ پرې نه پوهیدلو. د ملا طوطی اخند د همدغې اختراعی وینا په بدل کې د حاجی نو رنګ ماما وارثینو د هغه نوی نوزی غزنیچی پوستین همده ته ورکړ. پخوا خو دا د جنګونو، بمونو، توپونو، طیارو او بمبارونو مرګونه بیخی قحط وو او اکثره مرګونه به طبیعی مرګونه وو. ځینو طالبانو او ملایانو به محرابونه په څپیړو وهل، چې ژر یو بډای او شته من کس مړ شی چې د سقاط او خیرات درک ولګیږی. کله چې به ۸۰ کلن بوډا او یا هم بوډۍ مړه شوه، نو د لمسیانو، زامنو او نورو وارثینو لخوا به یې د خیراتونو او ختمونو شین غومبر جوړ وو او په همدغه غومبر کې به د علما کرامو پینځه ګوتې په غوړو کې ډوبې شوې. همداسې یوه کیسه زموږ د کلی سلیمانخیلو په خپله رقیبه قبیله ناصرانو پورې نښلولې وه. ویل کېږی، چې د بر کلی حاجی بادرنګ اکا له دمان څخه نوی کلی ته راغلی وو. په دمان (هندوستان) کې خورا چاغ شوی وو، پر څټ یې مړوند  نه راتاوېدلو او ټول وجود یې د کولیسترولو په غړکه باندې بدل شوی وو.حاجی بادرنګ اکا کلی ته له رانګ سره سم پر غوړو میلمستاوو واوښت. نن زموږ کره میلمه، سبا ستاسې میلمه، بله ورځ یې د لمسیانو میلمه او په راتلونکې جمعه یې د خیښانو مړۍ ده، دا سلسله تقریباً د نه شلیدلو او نه تم کیدلو پړاو ته رسیدلې وه. په هره میلمستیا کې به حاجی بادرنګ اکا ته د لاندی د مږانو سپینې کترې پخیدلې، د لم ښوروا به وه، د وازدو جیزغالی به وې، د غوا ژړ غوړی به وو او د غوړو نور نوعیتونه او ډولونه به وو، چې د حاجی بادرنګ اکا اختصاصی میلمستیاوې به پرې رنګینې او لونګینې وې. د خدای شپې او ورځې دی هغه ورځ هم را ورسیده، چې د حاجی بادرنګ اکا د وینو غوړو څاڅکو د هغه د زړه حرکتونو ته پاټک واچاوه او حاجی بادرنګ اکا د خپل دالان پر ټغر په ترپکو ترپکو کې ساه پوه کړه. په سبا په کلی کې اوازه ګډه شوه، چې حاجی بادرنګ اکا مرګ مناجات شو. کلیوالو بیلچې او کنګونه پر اوږو واخیستل او حاجی بادرنګ اکا یې د کلی په ستره هدیره کې تر خاورو لاندې کړ. په بل سبا یې د کلی په لویه حجره کې د پاتا (فاتحې) ټغرونه وغوړېدل ، مخلوق را روان وو، خیراتونه وو او د باردنګ اکا صفتونه وو، جنت ته یې د تللو نښې نښانې وې، چې بیان یې تاوان نه درلود. د پاتا په مراسمو کې د بر کلی ملاصاحب د بادرنګ اکا له ورور حاجی کړنګ اکا څخه پوښتنه وکړه، چې حاجی دادا د جنت نښانه ښکاره کړه که نه؟  حاجی ګړنګ اکا د خپل زیړ بوسکی پټکی شمله شاته ووهله او په خورا مطمئن اواز یې ځواب ورکړ: هو ولې نه، د جنت دوې نښې یې ښکاره کړې.کله چې یې ځنکدن شو په ترپکو ترپکو کې یې یوه کمکۍ نجلۍ په لغته ووهله او ځای پرځای یې ګنده کړه او بیا چې اخری سلګۍ یې وتله، نو د کولمو بوین باد یې په یوه غرت سره و اېستلو، تردې نو د جنت نښې زیاتې چیرې موندل کیږی. د حاجی بادرنګ اکا د جنت نښانې بالکل د استاد سیاف د سیاسی ژوند د وروستۍ فیصلې له نښانو سره مطابقت لری.فکر کوم، چې محترم استاد سیاف په تیرو دېرشو کالو کې د سیاسی او جهادی تصمیمونو په نیولو کې یو خاص ذهانت درلود او هره فیصله یې د جنت نښانه وه، خو دا ځل چې یې له محقق او مارشال قسیم سره کوم سیاسی تصمیم نیولی دی، دا تصمیم دده د سیاسی ژوندانه د آخری ځنکدن د جنت علایم او سمبولونه نندارې ته وړاندې کوی.

وایی، چې هوښیاره مرغۍ په دام کې نه نښلی، که په دام کې ونښته، نو غبرګې پښې یې د لومې تر غوړیاسې جاروزی.

استاد سیاف دا ځل په دواړو پښو د ډیموکراسۍ په لومه کې بند دی او ګومان نه کوم چې امریکایی صیاد او ښکاری دې د استاد سیاف تر دواړو پښو غوټه شوې لومې خلاصې کړی، بلکې ګومان خو دادی چې دغه غوټې به نورې هم پسې ټینګې کړی.مارشال فهیم او محقق چې دواړه د افغانستان د خلکو له معدې څخه استفراق شوی دی او هر یو یې په وژلو، تړلو، میخکوبونو او د مرګی د رقصونو شعبده بازان او نندارچیان دی، غواړی چې د استاد سیاف د مبارکې ږیرې شاته د یو بل ناټک تابیا وکړی.دغه تابیا به د استاد سیاف د جهادی زعامت او جهادی حاکمیت د مرګونی ځنکندن د جنتی علایمو او نښو نوې جوله او بکره تماشه وی.که ژوندی وو همدغه تماشه به هم وګورو، خو د دغې تماشې بیه د ملی حماقت، ملی جهالت او ملی کسالت هغه مثلت دی، چې د ملکیت دلالان یې همدا اوس د موندلو په لټه کې دی.

خدای مو دې حیا وساتی

ته وا امین

 

نواندیشی د هرچا اوهرڅنګه  افکار په آزاده توګه تر تاسو دررسوی چی هیڅکله هم د نو اندیشی پاڼی د تائید او یاهم د تردید په معنا نه شی انګیرلې .

 منبع : تاند 

جوابی بنویسید

ایمیل شما نشر نخواهد شدخانه های ضروری نشانه گذاری شده است. *

*

بالا